ได้กิ๋นก๋าลมอมก๋าหัวปี่ เดวแฮ่มน้อยจะไปซอถ้องโตย
ปี๋ใหม่เมือง <เงี้ยว>
1. 13 เมษา วันปี๋ใหม่เมือง กานกุ่งรุ่งเรือง มาถึงแล้วเล้า….สืบกั๋นมาโบราณแต่เก๊า จักขอเล่าประวัติเก่าสืบสาน วันนี้เปิ้นฮ้องสังขาลล่อง บอกปี้บอกน้องจะไปหน่ายไปจัง…นายเจ้าแม่นัง ไค่หันปู่สังขาลหื้อสูลุกมาผ่อ……ลูกหลานเหยจะไปหลับลุกขวาย มานั่งยังยายผ่อปู้สังขาลว่าอั้น หาบก๋วยล่องกองมานั้น หื้อสูลุกเจ๊าเตรียมถ้ากอยผ่อ….นายมอน…หมู่ละอ่อนก่ตั้งหน้าตั้งต๋า ปอล่วงเลยเวลา บ่ก๋ายมาซักเต้อ
2. ตี้แต้ เป๋นกุสโลบาย บ่หื้อหลับลุกขวายหื้อลุกมาเจ้า เจ้า….จ้วยอี่แม่ตักน้ำหนึ่งเข้า เจ๊ดหอ ยอเฮือน บ่หื้อเศร้าหม่นหมอง ฝึกเขาตั้งแต่ยามน้อย หื้อฮู้ฮีตฮอยต๋ามแบบครรลอง…นาเจ้าแม่นาย…ถ้าละอ่อนลุกขวายบ่ได้หยังซักอย่าง…
วันต่อไปตี้จะกล่าวอ้างหลัง เลยวันสังขาล 14 ว่าอั้น ความสำคัญเป๋นอย่างใดนั้น
เปิ้นเลยอู้กั๋นว่าเป๋นวันเน่า…นารี..เน่าแก๋งป๋า กะว่าเน่าแก๋งปี๋ หรือเน่าสิ่งบ่ดี กำเดียวจะบอก….
3. ต๋ามประวัติคนเฒ่าเล่าเมินมา มันเป๋นพญาหัวเน่าหัวจ้า…..
พระยาธรรมวิบาล เปิ้นฮับกำต้า ของพรหมจั้นฟ้า หื้อมา 3 ประก๋าร ยามเจ๊าศรีอยู่ไหนฮั้น ยามบ่ายไปนั้น ผดแผวยามแลง…นอเจ้าแม่นาย…ถ้าตอบบ่ได้ จะโดนตัดคอเป๋นแน่…ธรรมวิบาลปัญญาบ่ปอหลาย แก้ปัญหาบ่ได้ว่าอั้น เลยหนีเข้าป่าไปนั้น ไปหยุดไปยั้งอยู่เก๊าไม้ใหญ่…ป๋ายใบ..กึ๊ดไตร่ตรอง เฮาจะเยี๊ยะอย่างใด
จีวิตเฮาคงจักต๋ายเป๋นแน่….
4. ไปได้ยิน แฮ้งเฒ่าคุยกั๋น ดังฟ้าประธาน เฮาจะรอดเป๋นแต้…..
แฮ้งแม่ มันก่ถามแฮ้งปู้ พรุ่งนี้บ่ฮู้เฮาจะเอาหยังกิ๋น แฮ้งปู้บอกบ่ต้องเป๋นห่วง
จะได้กิ๋นซากหลวง ของธรรมวิบาล….นานแม่นาน…..
ก่เลยจ๋าขาน ถึงเหตุก๋ารเป๋นแน่….
แฮ้งเฒ่าก่เลยบอกจ๋า เฮาลุกเจ๊ามา ศรีอยู่หน้าว่าอั้น ต้องเอาน้ำมาซะซ่วยล้าง
เจ๊ดหน้าถูต๋า หื้อมันใสมันผ่อง….งามดี…ยามบ่ายคล้อย มันฮ้อนเต็มที
เอาน้ำใสดีลูบ อกตบบ่า….
5. ยามเมื่อแลง ขึ้นเฮือนเยี๊ยะกิ๋น ศรีอยู่ตี้ตี๋น เอาน้ำซ่วยล้าง….
ธรรมวิบาลได้ยินกำกล่าวอ้าง เลยรวดลาร้างจากป่าไม้ดงหนา ไปตอบปัญหา
ของพรหม สมดั่งใจ๋เลยบ่เสียชีวา…หนะเจ้าต่านหนะ…กำนั้นศรีษะ พรหมเลยหลุดจากบ่า….เป๋นว่าปี๋นี้ ปี๋ม้าหนา ศกสง้า เปิ้นฮ้องว่าอั้น ไปเล่าก็นวันนี้วันนั้น
บ่ดีไปแจ้ง บ่ดีไปด่า ….นอนาย…มันจะสุขก๋าย มันจะสุขใจ๋ เยี๊ยะหื้อร่างก๋าย
มันขาวใสสะอาด….
6. วันตี้ 15 เป๋นพญาของวัน มีความสำคัญอยู่นักบ่หน้อย….
หมู่ลูกหมู่หลาน หยิบแต่ง แฝงห้อย เตรียมน้ำส้มป่อย ไว้สละสลุง
ปากัน ไปปักตุงปักจ้อ ยกมือขึ้นขึ้นยอ ต่านเจ้าจะปั๋นปอน…วอนเจ้าแม่วอน…
ฮับศีลฮับปรต๋ามฮีตเดิมฮอยเก่า….ปิ๊กมาบ้าน เตรียมเนื้อเตรียมตั๋ว ไปดำหัวคนแก่คนเฒ่า ตึงบ่ว่าลูกหลานต๋านเต้า คนหนุ่มคนเฒ่า มารวมมิตรรวมญาติ….ป๋ายใบ..
มันตึงม่วนอก มันตึงม่วยใจ๋ ปี้น้องวงศ์ใย พร้อมเปียงเรียงหมู่…..
7. สิบหกสิบเจ็ด ปากปี๋ ปากเดือน บ่เลื่อนบ่รอ กั๋นในวันนี้……
ขออวยพรหมู่น้องหมู่ปี้ ขอหื้ออยู่ดี สุขบานหวานใจ๋ ตึงบ่ว่าคนไปคนอยู่ ขอเดินทางด้วยความปลอดภัย…นายเจ้าแม่นาย…ปรารถนาสิ่งใด สมใจทุกอย่าง…..
กำปรจ้างซอบ่ปอใคร่หวาน บ่เหมือนอาจารย์ ต่านเจ้ากล่าวอ้าง ฮักษาประเภณี
บ่ดีหลีกม้าง เล่นต๋ามประเภณี หื้อมันมีขอบเขต….แต้นา..บ่ดีเอาน้ำซะหน้า
กาว่าซะต๋า สมกำผาทะนา อย่างตู๋ข้าเขาว่า…..วางงง..เพลงงง ม่วนก่อจ้าว *-*
ไม่มีความคิดเห็น:
แสดงความคิดเห็น